ໃນວັນທີ 12 ພະຈິກ, 2024, ເວລາ 8:00 – 16:30ໂມງ, ກອງປະຊຸມ ຄົ້ນຄວ້ານະໂຍບາຍເສດຖະກິດ ເພື່ອສ້າງຄວາມຍືດຍຸ່ນໃຫ້ແກ່ເສດຖະກິດ ສປປ ລາວ, ຈັດຂື້ນທີ່ໂຮງແຮມ ເມືອງແທັງ, ນະຄອນຫຼວງວຽງຈັນ, ຜູ້ຈັດງານໂດຍ ສູນບໍລິການວິສາຫະກິດຂະໜາດນ້ອຍ ແລະ ກາງ ສະພາການຄ້າ ແລະ ອຸດສາຫະກຳ ແຫ່ງຊາດລາວ. ສະໜັບສະໜຸນໂດຍມູນນິທິເອເຊຍ ແລະ ສະຖານທູດອົດສຕາລີ. ຊຶ່ງເປັນກຽດປະທານໃນປະຊຸມໂດຍທ່ານ ດາວວອນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ກ່າວຕ້ອນຮັບ ແລະ ກ່າວເປີດງານ. ພ້ອມດ້ວຍມີປະທານຮ່ວມໂດຍທ່ານ ນາງ ເບນິຕ້າ ຊຳເມີເວວ, ຮອງເອກອັກຄະລັດຖະທູດ ສະຖານທູດ ອົດສຕາລີ ແລະ ທ່ານ ທັອດ ວໍເຊສ, ຜູ້ຕາງໜ້າມູນນິທິເອເຊຍ ປະຈຳ ສປປ ລາວ, ພາຍໃນກອງປະຊຸມສຳມະນາມີຜູ້ເຂົ້້າຮ່ວມ 150ທ່ານ ທີ່ມາຈາກຫຼາຍພາກສ່ວນເຊັນ: ພາກລັດ, ບັນດານັກຄົ້ນຄວ້າ, ພາກທຸລະກິດຜູ້ປະກອບກິດຈະການ, ບັນດາອາຈານ, ນັກສຶກສາ ແລະ ບັນດາອົງການຈັດຕັ້ງສາກົນ ແລະ ພາກພື້ນ.
ກອງປະຊຸມສໍາມະນາດັ່ງກ່າວແມ່ນເປັນເວທີໃນການຮ່ວມມືເພື່ອຄົ້ນຫາຍຸດທະສາດໃນການສ້າງຄວາມຍືດຍຸ່ນໃຫ້ແກ່ເສດຖະກິດ ສປປ ລາວ ແລະ ສົ່ງເສີມການຮ່ວມມືໃນທົ່ວທຸກຂະແໜງການ ເຊັ່ນ: ການທ່ອງທ່ຽວ, ກະສິກຳ, ການຂົນສົ່ງ, ແລະ ພະລັງງານທົດແທນ. ຜູ້ເຂົ້າຮ່ວມສາມາດໄດ້ຮັບຟັງການນຳສະເໜີຫົວຂໍ້ເສດຖະກິດຕ່າງໆຈາກຜູ້ຊ່ຽວຊານໃນແຕ່ລະຂະແໜງ ລວມທັງໄດ້ຮັບຟັງ ແລະ ຮ່ວມສົນທະນາ ເພື່ອຊອກຫາແນວທາງພັດທະນາຍຸດທະສາດໃນການແກ້ໄຂບັນຫາເສດຖະກິດທີ່ ສປປ ລາວຢ່າງມີປະສິດຕິພາບ.
ພາຍໃນກອງປະຊຸມສຳມະນາດັ່ງກ່າວ ໄດ້ມີການນຳສະເໜີບັນດາຫົວຂໍ້ທີ່ສຳຄັນຈາກຜູ້ຊ່ຽວຊານ ເຊິ່ງລວມການປັບປຸງສະພາບແວດລ້ອມຂອງການລົງທຶນ ໂດຍການຮ່ວມມືລະຫວ່າງພາກລັດ ແລະ ພາກທຸລະກິດໃຫ້ແໜ້ນແຟ້ນຍິ່ງຂື້ນ ລວມທັງການແກ້ໄຂບັນຫາດ້ານການຄ້າ ແລະ ການລົງທຶນຂັ້ນພື້ນຖານ, ລະບຽບການຂອງການ ຈັດເກັບ ລາຍຮັບຈາກພາສີ-ອາກອນ ຂອງ ສປປ ລາວ, ຜົນການສຶກສາຄົ້ນຄວ້າ ກ່ຽວກັບ ການປັບປຸງການເກັບລາຍ ຮັບ ແລະ ການລະດົມລາຍໄດ້ ຂອງ ສປປ ລາວ, ການປົກປ້ອງສິດຊັບສິນທາງປັນຍາ ຕໍ່ການພັດທະນາເສດຖະກິດ, ການລົງທຶນດ້ານກະສິກຳແບບຍືນຍົງ ແລະ ສ້າງມູນຄ່າເພີ່ມໃຫ້ແກ່ການແປຮູບຜະລິດຕະພັນກະສິກຳ ເພື່ອຊຸກຍູ້ການຜະລິດ ແລະ ສົ່ງອອກ, ແລະ ນະໂຍບາຍສົ່ງເສີມການລົງທຶນເພື່ອຊຸກຍູ້ການລົງທຶນ ໃນໄລຍະປີ 2025 – 2030. ນອກນັ້ນຍັງມີການຮ່ວມສົນທະນາແລກປ່ຽນຄຳຄິດຄຳເຫັນຫວ່າງຜູ້ຊ່ຽວຊານ, ນັກຄົ້ນຄວ້າ ເສດຖະສາດ ແລະ ຜູ້ວາງກຳນົດນະໂຍບາຍ ໃນຫົວຂໍ້ ການສ້າງຄວາມຍືດຍຸ່ນໃຫ້ແກ່ເສດຖະກິດໃນ ສປປ ລາວ, ການແລກປ່ຽນດັ່ງກ່າວແມ່ນສາມາດຊ່ວຍໃຫ້ມີການເຂົ້າເຖິງບັນຫາທີ່ເລິກເຊິ່ງ ແລະ ແນວທາງຍຸດທະສາດທີ່ສາມາດນຳໃຊ້ເປັນແນວທາງໃຫ້ຜູ້ກຳນົດນະໂຍບາຍ, ຜູ້ນຳດ້ານທຸລະກິດປະກອບກິດຈະການ, ແລະ ສະຖາບັນຄົ້ນຄວ້າ – ສະຖາບັນການສຶກສາ ນຳໄປພັດທະນາ ແກ້ໄຂບັນຫາເສດຖະກິດ ໃນສປປ ລາວໄດ້ໃນອານາຄົດ.
ກອງປະຊຸມສຳມະນາດັ່ງກ່າວ ຈະປະສົບຜົນສໍາເລັດໃນການແລກປ່ຽນຄວາມຮູ້ ແລະ ປະສົບການ, ສົ່ງເສີມການສົນ ທະນາທີ່ມີຄວາມໝາຍ, ແລະ ສາມາດປະກອບສ່ວນເຂົ້າໃນການແກ້ໄຂບັນຫາເສດຖະກິດໃນ ສປປ ລາວໃຫ້ມີຄວາມຍືດຍຸ່ນຫຼາຍຂື້ນ.
