ວັນທີ 16 ທັນວາ 2024 ສະພາການຄ້າ ແລະ ອຸດສາຫະກໍາ ແຂວງອຸດົມໄຊ ແລະ ຫ້ອງການອຸດສາຫະກໍາ ແລະ ການຄ້າ ເມືອງແບງ, ໄດ້ສະຫຼຸບປິດ ຊຸດຝຶກອົບຮົມການຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ ໃຫ້ກຸ່ມຫັດຖະກໍາຜ້າຝ້າຍ ບ້ານຍໍ້ ແລະ ບ້ານນາງົວ ເມືອງແບງ, ແຂວງອຸດົມໄຊ. ເປັນກຽດເຂົ້າຮ່ວມພິທີມີ ທ່ານ ນາງ ດາວວົງ ກອງມະນີ ຮອງປະທານສະພາການຄ້າ ແລະ ອຸດສາຫະກໍາ ແຂວງອຸດົມໄຊ, ທ່ານ ຄໍາແດງ ສີອໍາໄພ ຫົວໜ້າຫ້ອງການອຸດສາຫະກໍາ ແລະ ການຄ້າເມືອງແບງ ມີຄະນະປະຈໍາສະພາການຄ້າເມືອງ, ນາຍບ້ານ ແລະ ສໍາມະນາກອນ ຈາກກຸ່ມຫັດຖະກໍາຜ້າຝ້າຍ ບ້ານຍໍ້ ແລະ ບ້ານງົວ ເຂົ້າຮ່ວມ 41 ທ່ານ.
ໃນພິທີ ທ່ານ ໄລພອນ ແກ້ວມະນີວອນ ຜູ້ປະສານງານໂຄງການ: ສົ່ງເສີມຄວາມສາມາດໃຫ້ຜູ້ປະກອບການ, ຊ່າງຫັດຖະກໍາ ແລະ ປະຊາຊົນຜະລິດຜ້າຝ້າຍ ຢູ່ແຂວງອຸດົມໄຊ, ໄດ້ຂື້ນລາຍງານການຈັດຕັ້ງປະຕິບັດກິດຈະກຳໂຄງການຝຶກອົບຮົມການຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ຕະຫຼອດໄລຍະ 9 ວັນຜ່ານມາ.
ຊຶ່ງຊຸດຝຶກອົບຮົມ ໄດ້ແບ່ງເປັນ 2 ກິດຈະກໍາ: ກິດຈະກໍາທີ່ໜຶ່ງ ໄດ້ຝຶກອົບຮົມວິທີຍ້ອມສີທໍາມະຊາດ ຈໍານວນ 6 ສີຄື: ສີແດງ, ສີບົວ, ສີເຫຼືອງ, ສີນິນ, ສີດໍາ ແລະ ສີນໍ້າຫ້ອມ ໃຫ້ກຸ່ມຫັດຖະກໍາຜ້າຝ້າຍ ບ້ານຍໍ້ ໂດຍນໍາໃຊ້ວັດຖຸດີບຈາກທຳມະຊາດເປັນສ່ວນປະສົມໃນການຍ້ອມສີທຳມະຊາດເປັນຕົ້ນແມ່ນໝາກກະເປົ້າ, ເປືອກຄາມເຄືອ,ໃບໝາກສີດາ, ໃບຫ້ອມ, ຂີ້ໝິ້ນ ແລະ ຫອມເລືອດ (ຜັກບົວເລືອດ) ມີຜູ້ເຂົ້າຮ່ວມຝືກອົບຮົມປະກອບມີ 14 ຄົນ;
ກິດຈະກໍາທີ່ສອງ ໄດ້ຝຶກອົບຮົມເຕັກນິກການອອກແບບ ແລະ ຕັດຫຍິບກະເປົາ-ເສື້ອລື້ແບບປະຍຸກ ໃຫ້ກຸ່ມຕັດຫຍິບ ບ້ານນາງົວ ໃນການແປຮູບຜ້າຝ້າຍມາເປັນເສື້ອລື້ ແລະ ແພເສດມາເປັນກະເປົາ ມີຜູ້ເຂົ້າຮ່ວມທັງ ໝົດ 11 ຄົນ. ຈາກນັ້ນກໍ່ໄດ້ມອບໃບຢັ້ງຢຶນຜ່ານຫຼັກສຸດການຝຶກອົບຮົມຍ້ອມສີທໍາມະຊາດ ແລະ ຕັດຫຍິບກະເປົາ, ເສື້ອລື້ ໃຫ້ກຸ່ມຫັດຖະກໍາຜ້າຝ້າຍທັງ 2 ບ້ານ.
